नेपाली हास्यव्यङ्ग्य अनलाइन पत्रिका

अन्जु शर्मा :

आमाले भन्नु भयो— पुर्खाले आर्जेको यो भूमिलाई संरक्षण गर्न सन्तान जन्माएकी छु । केही तलवितल त नपर्ला नि नानी ?’

‘खोइ आमा म के भनूँ ? आफैँ हेर्नु न ।’ उसले जवाफ फर्काई ।
आमाले मेचीदेखि कालीसम्म, हिमालदेखि तराईसम्म हेर्नु भयो र सुस्केरा हाल्दै, थप्लोमा हात राखेर मलिन स्वरमा बर्बराउनुभो – “कस्ता पातकी सन्तान जन्माएछु ।’

‘किन के भयो र आमा ?’ उसले सोधी ।
‘के भयो भन्नु नानी ? बरवाद नै भइसकेछ ।’
‘भयो चाहिँ के ? भन्नु न आमा ।’ उसले फेरि खोतली ।

आमाले भन्नुभयो— के भएको रहेनछ र नानी ? कर्मचारी भनाउँदो भ्रष्ट निक्लियो । नेता आफै दलाल भयो । न्यायाधीश तस्कर बचाउने । पुलिस अपराधी जोगाउने । साधु भनेको बलात्कारमा संलग्न हुने । त्यो मास्टर स्कुल कलेजमा राजनीति गराउने । उद्योगपति युवा विदेश पठाएर वृद्धाश्रम अनि स्कुलको सट्टा जेल खोल्ने । तस्कर भएर भाइ, दिदीहरूलाई कोठीमा पुर्‍याउने । योभन्दा बढी के हुनु पर्‍यो र ?

‘तिनलाई कानुनको दायरामा ल्याउनु पर्छ नि आमा’ ऊ भन्दै थिई ।
‘नाप्यौ ! सबै सन्तान झगडालु भए । मैलाई टुक्य्राउन खोज्छन् । यस्ता कृतघ्न सन्तान जन्माएँ मैले । अब मचाहिँ कसरी प्रायश्चित गरूँ ?’

०००
रातोपुल, काठमाडाैं