नेपाली हास्यव्यङ्ग्य अनलाइन पत्रिका

बासुदेव तिमल्सिना :

“श्रीमान् ! यो मुद्दामा मेरो प्रतिपक्षले जित्ने कुनै आधार नै छैन । सोह्रै आना मेरो क्लाइन्टको पक्षमा फैसला होस् । मैले आवश्यक पर्ने सबै प्रमाणहरु पेश गरेको छु ।”

“होइन श्रीमान् ! मेरो विद्वान मित्र महोदयले भनेको कुरा निराधार छ । जसरी पनि मेरो पक्षले मुद्दा जित्नुपर्छ । सम्बन्धित कानुनको दफा २२, पेज नं. २५ मा मेरो पक्षले मुद्दा जित्ने बलियो आधार दिइएको छ । सो दफालाई अध्ययन गरियोस् ।”

दुवै पक्षको जिरह सुनेपछि श्रीमानबाट पछिल्लो वकिललाई कानुनको किताब पेस गर्ने आदेश भयो ।
आदेश बमोजिम वकिलले किताब श्रीमान् समक्ष पेस गरे । किताबमा भनिएको पेज न्यायधीशले पल्टाए । सो पेजमा बीसवटा हजारका नोट राखिएको थियो । सो देखेर श्रीमान् मुस्कुराउनु भो ।

अनि पुलुक्क सो किताब दिने वकिलको मुखमा हेरेर आदेश गर्नु भो, “अर्को पेशीको दिन यस्तै थप अरु चारवटा प्रमाण पेस गरियोस् ।”

०००
लालबन्दी, सर्लाही