नेपाली हास्यव्यङ्ग्य अनलाइन पत्रिका

यी अबोला शिलालाई देवता कसरी भनूँ ?
शब्द मात्रै थुपारेर कविता कसरी भनूँ ?

जहाँ मान्छेहरू बीच पाइन्न स्नेह-वैभव
सुनिँदैन जहाँ गीत वासन्ती युगको नव ।
यस्तो सङ्कीणर्तालाई नव्यता कसरी भनूँ ?
यो छाडा नग्नतालाई सभ्यता कसरी भनूँ ?

जहाँ मानिसमा हुन्छन् भोकका रोगका कथा
बुझ्ने धैर्य जहाँ छैन मान्छेका वेदना-व्यथा
यस्तो दुष्पात्रतालाई पात्रता कसरी भनूँ ?
यो क्रूर दुष्टतालाई मित्रता कसरी भनूँ ?

खेली अनीतिका खेल भन्दछन् “राजनीति“ यो
ल्यायौँ  रीति नयाँ भन्छन् फिँजी जालो कुरीतिको
यस्तो कुटिलतालाई शिष्टता कसरी भनूँ ?
यो त्याज्य तुच्छतालाई उच्चता कसरी भनूँ ?

सिङ्गो ऐना फुटालेर टुक्राटुक्राहरू सबै
फेरि जोड्यौँ भनी टाँसी व्यर्थै भ्रान्ति फिजाउँदै
गरेको धृष्टतालाई श्रेष्ठता कसरी भनूँ ?
टुटेका मान्यतालाई एकता कसरी भनूँ ?

जहाँ खेती छ मिथ्याको छैन सत्य निरूपण
श्रमको छैन सम्मान कर्मको छैन पूजन
यस्तो अभद्रतालाई भद्रता कसरी भनूँ ?
गतिको पश्चतालाई अग्रता कसरी भनूँ ?

चितवन