गोविन्दराज विनोदीउहाँ
चिनीतुल्य मीठो बनाएर बोली नुही बाँसझैँ भोटको थाप्न झोली उहाँ पाल्नुभो फेरि माग्दै गुहार चिनौँ है सबैले उहाँको मुहार !
दिलैदेखि सम्मान गर्दै झुकेर
नमस्कार गर्दा समीपै पुगेर
हिजोसम्म जो हिँड्नुहुन्थ्यो नहेरी
उहाँ पाल्नुभो हात जोडेर फेरि
मजाका गफैको जमाएर खाल
नभाँचेर सिन्को बित्यो कार्यकाल
बनून् फेरि सोझाहरू मूर्ख ठानी
उहाँ पाल्नुभो आज लाजै नमानी
लिई घोषणापत्र आफ्नो दलीय
जहाँ कल्पनाका कुरा छन् स्वकीय
त्यसैको दुहाई दिई भोट तान्न
उहाँ पाल्नुभो स्वार्थको जाल हान्न
म नै राष्ट्रसेवी म नै योग्य नेता
बनाऊन् सबैले मलाई विजेता
भनी दीनका भावनामाथि खेल्दै
उहाँ पाल्नुभो फेरि मिथ्या सुसेल्दै
चिनीतुल्य मीठो बनाएर बोली
नुही बाँसझैँ भोटको थाप्न झोली
उहाँ पाल्नुभो फेरि माग्दै गुहार
चिनौँ है सबैले उहाँको मुहार !
चितवन
