नेपाली हास्यव्यङ्ग्य अनलाइन पत्रिका

मुख चाहिँ निकै ठूलो खाई तृप्त हुँदैनझैँ
आँखा छन् अति नै साना उदात्त दृष्टि छैनझैँ
पच्दैन हितको वाणी घाँटी छ साँघुरो अति
पेट अत्यन्त ठूलो छ खान सक्ने मिले जति

खुट्टा छन् लहुराजस्ता धान्लान् शरीर के गरी
छन् तीखा हातमा नङ्ग्रा पञ्जा हुन् बाघकासरि
पाइताला भने लामा छन् जो दौडन माहिर
पुगी लिग्लिगमा राजा हुनसक्ने छ जाँगर

कुर्सीको सपना बोक्ने फर्सी जत्रो छ टाउको
रक्त चुस्न मिले मानौँ बन्न सक्तछ ऊ जुको
परिवर्तनको टाँगी नयाँ बोर्ड निधारमा
पुरातन कुरा मात्र राखेको छ हियारमा

देशभक्त बनेको छ जनतासामुमा तर
विदेशी प्रभुका सामु झुकेको छ निरन्तर
देखी नेपालका नेता सोच्दो हो विधिले पनि
आहा ! कार्टुन क्या राम्रा बनायो कसले भनी ।

०००
नवलपरासी