नेपाली हास्यव्यङ्ग्य अनलाइन पत्रिका

फेरि गाउँ सहरमा चुनाव आ छ
गाउँटोल झण्डैझण्डाले झकिझकाउ भा छ
पछिपछि लाग्नेले
दिनैपिच्छे मासु भात खान पा छ
तेल नपाउनेले तेल पा छ
रेल नपाउनेले रेल पा छ
जागिर नपाउनेले
चुनाबकै दिनसम्म किन नहोस्
गतिलै जागिर पा छ
त्यसैले, हे भगवान ! चुनाव आइरहोस् ।

बोल्धे दमाई अरुबेला नेतालाई जदौ गर्छ
जब चुनाब आउँछ बोल्धेले
दिनैपिच्छे नेताको जदौ पा छ
दुखीको बेला पनि चुनावमा आउँछ भन्छन्
देख्दा नि मुन्टो बटार्नेहरू
दिनैपिछे घरमै भेट्न आ छ
त्यसैले, हे भगवान ! चुनाव आइरहोस् ।

न बिजुली गा छ
न धारामा पानी नआ छ
आउने कुरा नि आ छ
नआउने कुरा नि आ छ
सिङ्गापुर र स्विजर्ल्याण्ड आ छ
सहरमा रेल र पानी जहाज आ छ
ओछ्यानमै भात टक्राउने आश्वासन आ छ
चुनावको दिनसम्म देश बिकास टन्न भा छ
अभाव निमिट्यान्न भा छ
त्यसैले, हे भगवान ! चुनाव आइरहोस् ।

पार्टीमा एक सुको योगदान नभए नि
सम्धिले चुनाबमा टिकट पा छ
सक्नेले खानसम्म खा छ
आफन्तहरू खुसी हुने बेला आ छ
फर्केर नहेर्ने सन्ते फेरि घेरमै भेट्न आ छ
त्यसैले, हे भगवान ! चुनाव आइरहोस् ।

अरु बेला एता आइज भन्नेले
एता आउनुहोस् न हजुर भन्दै बोला छ
सडकले कालो लिपिस्टिक ला छ
गाउँ सहरमा बिकासको लहर आ छ
भोज भतेरको उछिनपाछिन भा छ
खान नपाउनेले खान पा छ
पिउन नपाउनेले पिउन पा छ
त्यसैले, हे भगवान ! चुनाव आइरहोस् ।

एउटै मान्छे पाँच ठाउँ गा छ
म त तपाईकै मान्छे हुँ भन्दै गफ ला छ
उताको पैसा खाँदै एता भोट ला छ
सुको नहुनेको गोजी पोटिलो भा छ
बैंकमा पैसा छैन तर टैन्कामा पैसा टन्न आ छ
त्यसैले, हे भगवान ! चुनाव आइरहोस् ।

शिक्षा फ्रि मा आ छ
स्वास्थ्य फ्रि मा आ छ
नदेखेको नसुनेको
नहुने नपुग्ने घोषणा भा छ
मान्छे आश्वासनै आश्वासनले अघा छ
त्यसैले, हे भगवान ! चुनाव आइरहोस ।

जे भए पनि जताबाट भए नि बजेट आ छ
रामेले घरमा टिनको छाना ला छ
आमसभाको गतिलै प्रतिस्पर्धा भा छ
आमसभाले पोलेको मकै बिक्री भा छ
जसले जे माग्यो त्यहि पा छ
कसैले शिर कसैले पुच्छर पा छ
त्यसैले, हे भगवान ! चुनाव आइरहोस् ।

काठमाडौं