नेपाली हास्यव्यङ्ग्य अनलाइन पत्रिका

संविधान बन्यो दरिद्रहरूको आएन पालो किन ?
सेतै छन् हिमश्रृङ्खला, तर बन्यो व्यापार कालो किन ??
फ्याँकिन्छन् दिनकै कसिङ्गर यतै, बढ्दै छ जालो किन ???
टन्नै दाँतहरू त छन् नि मुखमा, थोत्रो छ गालो किन ????

खाईमात्र रहन्छ हर्दम दिसा गर्दैन किर्नो किन ?
माछाले दिनकै नुहाउँछ अरे ! बन्दैन चोखो किन ??
सेतै हुन्छ कपास ! दीप जसको कालो छ ध्वाँसो किन ???
गाईलाई कन्याइदिन्छ शुरुमा त्यो दुष्ट ब्वाँसो किन ????

कालो बादल डम्म भो गगनमा उघ्रेन कैल्यै किन ?
कालो चाल चल्यो सदा सदनमा सुध्रेन कैल्यै किन ??
कालो रात गयो भनेर दिनहुँ फुक्ने गरेको किन ???
कालो क्यै छ र दालमा सहमती टुट्ने गरेको किन ????

हाम्रा उर्वर खेत बाँझिन पुगे रोपिन्न खै धान रे !
वस्ती मौन छ स्वाभिमान कुँडियो गुम्दैछ त्यो शान रे !!
बन्दै छन् दिनहुँ पहाडतिरका आवास झाडी किन ?
माटो रुग्ण छ देशको तर तिमी ताक्छौ नि खाडी किन ??

बम्घा, गुल्मी