कता छुटिएछ ?
आ...तैले पढ्नु पर्दैन बाबू भनेर छोराले पढ्ने थोत्रे लालटिन आजको मिटिङलाई चाहिन्छ पनि भनेकै हो समतामूलक राज्यसत्ता प्राप्तिको लडाईंमा अग्रमोर्चाको सिपाही बनेकै हो ।
एक कुनाको गुनासो, जस्तो सुनियो त्यस्तै बुनियो
सँगै राजनीति सुरु गरेका हामी
वहाँ मञ्चमा म किनारमा
हरेक साँझ थात्रे कसौंडी कोट्याउँदै गर्दा म
वहाँ दिउँसो लन्चमा राती डिनरमा ।
हैन कहिले कहाँ पो छुटिएछ ?
श्रीमतीले साँचेर राखेको बीउ कोदो सुटुक्कै बेचेर
लेबी पनि तिरेकै हो
साथीभाइहरूले बोक्नुपर्छ है भन्दा
कागजले भरिएको झोला पनि भिरेकै हो
घरको मूल ओछ्यान
अपरिचितलाई सुम्पिंदै
माइलीको मजेत्रो ओढेर
पर्तिर पालीमा पनि सुतेकै हो
तल पिपलबोटेमा राती आउनुपर्छ है भन्दा
हस हजुर ! भनेर जुटेकै हो
हैन कहाँ पो छुटिएछ ?
आ…तैले पढ्नु पर्दैन बाबू भनेर
छोराले पढ्ने थोत्रे लालटिन
आजको मिटिङलाई चाहिन्छ पनि भनेकै हो
समतामूलक राज्यसत्ता प्राप्तिको लडाईंमा
अग्रमोर्चाको सिपाही बनेकै हो
तर हिंड्दा हिंड्दै
पछाडि परिएछ
ठेलमठेल भिडमा
थाहै नपाइ किनारातिर झरिएछ
हैन कहाँ पो छुटिएछ ?
०००
गौरादह, झापा