नेपाली हास्यव्यङ्ग्य अनलाइन पत्रिका

चुनाव आउँदै बन्छन् मीत,
विनीत भै गर्छन् भ्रमित
आकाशबाट तारा झार्ने जस्ता,
फेद न टुप्पो भएका
झूठा आश्वासन बाँडेर,
बुझाउँछन् हाम्रो चित्त ।
तर जितेर चुनाव गर्छन् काम,
जनभावना विपरित ।

प्रश्न अनेकौं छ्न्,
पटक पटक बिराउने किन ?
जो छ निकम्मा,
जीतको तक्मा भिराउने किन ?
आफ्नो घरमा छिराउने किन ?
स्वहितमा नै बञ्चरो हानी
आफूलाई नै सिध्याउने किन ?

जहिले जसलाई छानेर ल्याउँछौँ
गर्न हाम्रा समस्याको समाधान
उही हुँदा सत्तामा विराजमान
गर्छ पदका लागि हानाहान
सिध्याएर सबै मूल्य मान्यता
स्वार्थका वशिभूत भएर
गर्छ हानाहन- जानाजान
ठान्छ आफूलाई सर्वशक्तिमान
बन्छ विकासयात्राको व्यवधान ।

हुलमा लागेर बिल्कुल
नहोस् कतै कुनै भूल
क्षणिक लोभमा परेर जित्नु हुँदैन ऊ
जो छ जनचाहना प्रतिकूल ।

यसपालि कसीमा घसी घसी
गरेर भगिरथहरूको पहिचान
जाँचेर उम्मेदवार, गर्नु छ मतदान
सावधान- सावधान,
केही बिरालाहरू पनि चन्दन घसेर
पसेका छन् बस्ती बस्तीमा
चटकेहरूबाट सावधान !!!

०००
विराटनगर