नेता नबन्ने म त
पाए भोट चुनावमा छल गरी बन्छौं भनी साँसद । थाले दाम हसुर्न राष्ट्र करको लिन्छन् सँधै हुर्मत । ती हाम्रा मतले बन्यो महलको ढल्दै नढल्ने छत । माटो सुन्दर मास्न छल्न कसिने नेता नबन्ने म त ।
सत्तामा छलछाम झेल नभए नेता नबन्ने भयो ।
पैसाले पद किन्न दाम नझिके मन्त्री नबन्दै गयो ।।
नारा झूठ दिई दिमाग भुटिँदा कस्तो हुने हालत ।
स्वार्थै स्वार्थ लिएर देश लुटिने नेता नबन्ने म त ।।
गुण्डा साथ रहेर रक्षक हुँदा मान्दै नमान्ने डर ।
बन्ने देश भएन पत्रु हुन गो नेता भए बाँदर ।।
राम्रा विज्ञहरू गए पर पुगे बाँकी भए लम्पट ।
गुण्डाराज सँधै चलाउन भनी नेता नबन्ने म त ।।
हाम्रो राष्ट्रियता विखण्डन भयो नेता हुँदा कारण ।
मन्त्री साँसद बन्न उद्दत हुने छन् कार्यकर्ता गण ।।
धान्ला के भन देशले नगदमा बण्डा गरेका पद ।
बिक्ने राष्ट्रियता अँगाल्न कहिल्यै नेता नबन्ने म त ।।
लाग्दैछन् परदेशतर्फ बलिया खाडी बने उर्वर ।
बाँझा खेतहरू बने चउर झै बारी भए जर्जर ।।
कुर्दैछन् घर बालवृद्ध महिला छैनन् मलामी तक ।
बेच्ने त्यो परदेशमा नवयुवा नेता नबन्ने म त ।।
पाए भोट चुनावमा छल गरी बन्छौं भनी साँसद ।
थाले दाम हसुर्न राष्ट्र करको लिन्छन् सँधै हुर्मत ।
ती हाम्रा मतले बन्यो महलको ढल्दै नढल्ने छत ।
माटो सुन्दर मास्न छल्न कसिने नेता नबन्ने म त ।।
०००
काठमाडौं