सिन्डीकेटको जात्रा
सिन्डीकेट चलाउने बजेट छ ठूलो भित्रभित्रै मिलाउने बनेको छ दुलो । माथिदेखि तलसम्म फैलाएको धन्दा निरन्तर चुलिँदो छ हिजो, अस्तिभन्दा ।
नाफाखोरी हैकमको फैलाएर जरा
सीधा-सादा मरेका छन् वैलाएर बरा !
सवारीमा मनोमानी जता हेर्यो उतै
एकलौटी नभएको क्षेत्र छैन कतै ।
समितिले चलाएका बस चन्छन् जति
बूढा-पाका यात्रुलाई सताउँछन् अति ।
मनपरी गरी गाडी चलाउँछन् छिटो
सिन्की खाँदै जस्तो गरी पार्छन् धुलोपिठो ।
एकोहोरो मुसारेर युवतीका गाला
भाडा लिन्छन् मनोमानी दादागिरी चाला ।
पकेट्मार्ने धन्दा गर्छन् मौका खोजीखोजी
यताउति छामेपछि रित्त्याउँछन् गोजी ।
खलाँसीले हप्काएर गुण्डागर्दी गर्छन्
बसभित्र उठाएर मनपर्दी गर्छन् ।
बोल्छन् कोही रामायण कोही नारायण
सुन्न पनि नसकिने गीता पारायण ।
खोरभित्र भेडा-बाख्रा घचेटेको जस्तै
तन्नेरी र तरुनीले अँचेटेको जस्तै –
ठेलम्ठेल, पेलम्पेल गराएर यात्रा
कतिञ्जेल चल्ने होला यस्तो गाईजात्रा ।
सिन्डीकेट चलाउने बजेट छ ठूलो
भित्रभित्रै मिलाउने बनेको छ दुलो ।
माथिदेखि तलसम्म फैलाएको धन्दा
निरन्तर चुलिँदो छ हिजो, अस्तिभन्दा ।
०००
नागार्जुन न.पा.-१, रानीवन, काठमाडौँ
९८४१४९१०८१