दुर्गा भमरकोटेसुन्तलाको प्रेम कहानी
भर नपर बटुवाको विश्वास कोही नगर । गफी ढँटुवा देखे फिर्ता बोलाऊ जाली बटुवा । औंठी चिनु छ सन्तान सहित नै फिर्ता दिनु छ ।
(सुसेली लयमा)
थिएँ बलेकी
लटरम्म फलेकी
प्यासी जलेकी ।
आयो बटुवा
देख्यो फले फुलेकी
बैँस झुलेकी ।
आयो सुटुक्कै
मीठो बोल्यो लाजले
भएँ भुतुक्कै ।
गर्यो चटारो
दन्तद्वारी मोहनी
हान्यो झटारो ।
माया जगायो
कटमिरो सुन्तला
बोटै समायो ।
दियो वचन
तिम्रै लागि साँचेको
चोखो जीवन ।
राम्रै लेखियो
देखेँ मीठो सपना
माली भेटियो ।
मन्द मुस्काएँ
थाहै नभै रुखको
काँडा खुस्काएँ ।
पार्यो जालैमा
मेरो मन उडायो
ख्याल ख्यालैमा ।
माया जमायो
टिप्यो खायो सुन्तला
मस्त रमायो ।
बाङ्गो बनायो
फल खायो चुसेर
नाङ्गो बनायो ।
मजा आएको
पुरै याम पछाडि
माया पाएको ।
माया गरेको
बोझ थोरै रुखको
हल्का झरेको ।
थोरै सघायो
ज्यानै खायो अघायो
गाडी मगायो ।
भाका राखेर
गयो पापी बटुवा
विदा मागेर ।
उस्तै खान्दान
अर्को वर्ष जन्मिए
धेरै सन्तान ।
मैले पर्खेको
वर्षौं वर्ष भैसक्यो
छैन फर्केको ।
मन मोडेर
गयो माया छोडेर
नाता तोडेर ।
कस्तो बटुवा
पार्यो माया जालैमा
रैछ फटाहा ।
भर नपर
बटुवाको विश्वास
कोही नगर ।
गफी ढँटुवा
देखे फिर्ता बोलाऊ
जाली बटुवा ।
औंठी चिनु छ
सन्तान सहित नै
फिर्ता दिनु छ ।
०००
कपन, काठमाडौं
Subscribe
Login
0 Comments
Oldest
