नेपाली हास्यव्यङ्ग्य अनलाइन पत्रिका

गुना डकारी पदमा बसेछन्
अनन्त भारी गहना भिरेछन्
विभेदकारी चलखेलमा छन्
घमण्ड गर्ने जन नासिनेछन् ।१

खसेर छानो घर मासिनेछन्
र चौरमा के बर काटिनेछन्
दिएर वाधा पर सारिनेछन्
घमण्ड गर्ने जन नासिनेछन् ।२

दगुर्न सक्ने मन टाढिनेछन्
भकुर्न सक्ने खल राखिनेछन्
कुकर्मकारी छलमा फसेछन्
घमण्ड गर्ने जन नासिनेछन् ।३

बिहान चर्को रवि देखिनेछन्
र साँझ अर्को कवि डाकिनेछन्
झुलुक्क आयो अनि भासिनेछन्
घमण्ड गर्ने जन नासिनेछन् ।४

झुलुक्क झुल्के चुपचाप हुन्छन्
भुसुक्क बिर्से खलपात्र बन्छन्
पिएर पानी ननिको हुनेछन्
घमण्ड गर्ने जन नासिनेछन् ।५

खराव बानी मनमा पसेछन्
लुटेर खाने ढिकुटी सकेछन्
निभेछ आगो सुकुटी हसुर्छन्
घमण्ड गर्ने जन नासिनेछन् ।६

०००
चितवन