नेपाली हास्यव्यङ्ग्य अनलाइन पत्रिका

निकैदेखि इच्छा थियो यो रहेको
कसो के गरे देश होला उठेको
तपस्या थियो वीरले थालिएको
थियो क्रान्तिको आरती बालिएको ।।

लडे वीर योद्धा डटी ज्यान फाले
कि फाँसी कि गोली चलाएर ढाले
प्रजा एक बन्दै लडे जाइलागे
स्वयं दुष्ट राणा तथा भूप भागे ।।

कहाँ रोक्न सक्थे प्रजातन्त्र आयो
सबैले भनेझैं मजातन्त्र आयो
जहाँ गो उसैको अहातन्त्र आयो
सबैको म बस्ने तँ जा तन्त्र आयो ।।

जता हेर मन्त्री जता खोज सन्त्री
बजे भिन्न भाखा सजे धेर तन्त्री
थियो एक जो राज्य सातै गरायो
सयौं मान्यको तान्यको मन्त्र आयो ।।

जहाँ घार काट्यो त्यहाँ हात चाट्यो
नपायो भने चर्किंदै चित्त फाट्यो
दिनै पर्छ खाजा भनी माग्न लायो
नयाँ माग्नका लागि संयन्त्र आयो ।।

०००
काठमाडौं