दुर्गा भमरकोटेमिल्दा/नमिल्दा नामहरू
सानो भर्याङ खुट्किलै नभएको ठूलो भर्याङ । छैन दर्कार स्याल र ब्वाँसा बस्ने सिंहदर्बार । पर्यो फसाद आँखा काम गर्दैनन् नेत्रप्रसाद ।
(सुसेली लयमा)
सोधौँ कोसङ्ग
थियोहोला प्रसङ्ग
अब झसङ्ग ।
लेख्छु सुसेली
पुतली भेटिँदैन
बत्तीस् पुतली ।
महाराज खै ?
महाराजगन्ज रे
कस्तो नाम है ?
कस्तो चाकरी
न माछा न पोखरी
माछापोखरी ।
खर्च हजार
छैनन् बाघ बगैंचा
बाघबजार ।
सुन बान्धव
टुक्रा छैन काठको
काष्ठमण्डप ।
गाईको गोठ
पुरानो भो सडक
भन्छन् न्यूरोड ।
हेर्छु गल्लीमा
छैन वन जंगल
वनस्थलीमा ।
सानो भर्याङ
खुट्किलै नभएको
ठूलो भर्याङ ।
छैन दर्कार
स्याल र ब्वाँसा बस्ने
सिंहदर्बार ।
पर्यो फसाद
आँखा काम गर्दैनन्
नेत्रप्रसाद ।
भर्छन् सामल
चर्को घाम प्रचण्ड
पुष्पकमल ।
गरे न्वारान
काम छैन हातको
हस्त नारान ।
गन्धे नालामा
न धोवी न कपडा
धोवी खोलामा ।
कस्तो जुर्यो खै
जो छ जाली फटाहा
नाम छवि है ।
दिनु दुख दे
गरिबको नाम के ?
धनवीर रे ।
गरिबदास
यो देशकै धनाढ्य
बन्छ उदास ।
नेता भन्दछन्
सडक नभए नि
पुल बन्दछन् ।
कति साह्रो हो
पहिचान यस्तो थ्यो
भन्न गाह्रो भो ।
नाम यस्तो पो
कला गला मिलेको
कलानिधि भो ।
साथी साथ दे
सच्चा कर्म गर्दैछन्
नरनाथले ।
०००
कपन, काठमाडौं
