नेपाली हास्यव्यङ्ग्य अनलाइन पत्रिका

हिमालको शिरमा
गुराँसको फूल सिउरेर
पहाडको
छातीमा
‘छेपारामुखे ताना’र
भिसीको तानाबाना टल्काउँदै
चुरे र महाभारतको
पटुकी बाँधी
कम्मरमा खुकुरी भिरेर
विजयको
दुन्दुभी बजाउँदै
तराईको
सुनौला पाउहरूले
स्वाभिमानका पाइला चालेर
जसले
संसारमाथि
जित निकाल्यो
त्यही हो गोर्खाली ।
जसले
चन्द्रसूर्य झण्डाको
शानदार गीत निकाल्यो
त्यही हो गोर्खाली ।

हिजो
प्रवासमा पनि
जुधेर
रैथाने बनेको गोर्खाली
आज,
दुई छाक खानकै लागि
विदेशी होटलमा
भाँडा मस्काउन
बाध्य भएपछि
ज्येष्ठ आमा बाउ
तरुनी श्रीमती र
बालक सन्तानलाई एक्लै छाडेर
छाती दुःख्ने गरी
चस्काउन विवश भएपछि
गोर्खे बनेको छ ।
कुर्सी पनि
गोर्खे भएर
जनताको रगतले
उठाएको
पहाड धस्काउन थालेपछि
हिमालको गौरव
खस्काउन थालेपछि
गोर्खे वुद्धिको
आविस्कार भएको हो ।
देशमा
टोपीदेखि कट्टुसम्ममा
भ्रष्टाचार भएको हो

गोर्खे वुद्धिले
अराएपछि,
कुर्सीहरु
बौलाउन थालेका छन् ।
जाँडका छोक्रा र
झोलभित्र अलमलिएर
भोट हराएपछि
निष्ठा र इमान
उत्तानो परेका छन्
झूटका खेती
मौलाउन थालेका छन् ।
कृषि र खेती मन्द छ
उद्योग बन्द छ ।
होलटाइम
झोला र झन्डा बोक्नेलाई
मासु भातको
प्रवन्ध छ ।
फुल टाइम
हलो र कोदालो बोक्नेलाई
आक्कलझुक्कल
नाकभरि
होटेलबाट हर्हराएको
मिष्ठान्नको सुगन्ध छ ।

गोर्खे बुद्धि
बढ्दै गएपछि
पृथ्वी नारानको मूर्ति
लड्दै गयो ।
बुद्धको सन्देश
सड्दै गयो
शिवको कल्याण
डढ्दै गयो
शिवलिङ्गको पारो
चढ्दै गयो
हुने पनि भयो
नहुने पनि भयो ।
देश बाँडियो
समाज भाँडियो
साँढे जुधेका जुध्यै गर्दा
वाछाको
अस्तित्व माडियो
जातिको नाममा
एकता टाढियो,
नाक र चाकको नाराले
सद्भाव भाँडियो ।
गोर्खे वुद्धि ।

सस्तोमा ओखती बेचेर
महंगोमा
मेडिसिन किन्यो
नदी विदेशलाई बेचेर
पानी किन्न विदेश हिन्यो ।
सत्ता पाउँदा
आफ्नो इँजार समाउदै ठिक्क
सत्ता नपाउँदा
अर्काको कन्दनी तान्दै ठिक्क ।
गाली गर्नेलाई
ताली ठोक्ने
काम गर्नेलाई
जीउँदै टोक्ने
बाँच्दा पनि
नेपाली बाँच्दैन
कांग्रेस, एमाले, माओवादी र
मधेशवादी बाँच्छ ।
मर्दा पनि
मान्छे मर्दैन
नेता र कार्यकर्ता मर्छ ।
गोर्खे बुद्धि !!!

०००
खाँदबारी