नेपाली हास्यव्यङ्ग्य अनलाइन पत्रिका

यो वीरै वीरको देश
गर्व लाग्थ्यो उहिले
यो भ्रष्टै भ्रष्टको देश
यो ठगै ठगको देश
सुन्दा, दिक्क लाग्छ अहिले ।

भूपीले लेखे –
“यो देश हल्लैहल्लाको देश”
अब लेख्नुपर्ने भयो
यो देश गल्लैगल्लाको देश
यो देश झल्लैझल्लाको देश ।

हल्का हावा चल्दा पनि ठूलो आँधी आएजस्तो
हल्का बतास लाग्दा पनि भीषण चक्रवात् चलेजस्तो
किन हुन्छ यस्तो हल्ला यो देशमा ?
हल्ला गर्नेलाई नै थाहा छैन
हल्ला सुन्नेलाई पनि थाहा छैन
हल्ला भइरहन्छ
हल्ला चलिरहन्छ ।
अचम्म छ यो देशमा चल्ने हल्ला
अनौठो छ यो देशमा चल्ने हल्ला
मानौ हल्ला बेगर बाँच्न सक्दैन
यहाँका हल्लाप्रिय मानिसहरू
यहाँका हल्लाप्रिय हल्लाप्रेमीहरू ।

जे पर्लापर्ला, महाशय !
ठग, भ्रष्ट, बेइमान, अपराधी, राष्ट्रघाती, देशद्रोही
सबैसबै मिलेर घोषणा गरेछन्-
यो देश बिक्रीमा छ !
देशका नागरिक विक्रीमा छन् !!
महाशय,
आज मलाई पनि यही हल्ला गर्न मन लाग्यो ।

०००
काठमाडौं