नेपाली हास्यव्यङ्ग्य अनलाइन पत्रिका

म भ्रष्टाचारी हुँ
केवल तिम्रो नजरमा
मेरो विरुद्ध
बाटोमा कुर्लनेहरू हो !
भन,
सक्छौ मलाई समाउन ?

म नेता हुँ
राजनीति बाहेक
केही काम छैन मेरो
मलाई पैसा चाहिँदैन ?
ठेक्का पट्टा मिलाएर
दुई चार करोड कमाएँ
भन के बिराएँ ?

म देश चलाउँछु
देश चलाउँदा
अवश्य पैसा पनि चलाउँछु
थोरै रकम
हिनामिना भयो भन्दैमा
मलाई भ्रष्टाचारी भनिहाल्ने ?

हिसाब किताब मिलाउन
कति गारो छ आफूलाई
पार्टी चलाउनै पर्‍यो
घर चलाउनै पर्‍यो
आफू चल्नै पर्‍यो
हो, राज्यकोषबाट
थोरै रकम चलाएँ मैले
यत्तिमा यत्रो कोलाहल ?

मेरो नजरमा
म पनि एउटा
सच्चा नेपाली हुँ
तिम्रो नजरमा
म भ्रष्टाचारी हुँ
सक्छौ मलाई समाउन ?

०००
२०८०/०१/२८
चितवन