नेपाली हास्यव्यङ्ग्य अनलाइन पत्रिका

कृृष्णशरण उपाध्याय पौडेल :

मात्रै भ्रष्ट निरीह शासन दियो, कालो बजारी दियो
गुण्डाराज र माफिया डन दियो, बेरोजगारी दियो
नेताका परिवार पोषण दियो, मार्‍यो सबैको मन
यो नाथे गणतन्त्रले मुलुकमा , खै के दियो लौ भन ? १

आकाशे महँगी दियो छल दियो, देशै लुटाहा दियो
सत्ता भित्र ठगी दियो खल दियो, पार्टी फुटाहा दियो
गिर्दो आर्थिकता र सङ्कट दियो, झन्झन् तुह्यो जीवन
यो नाथे गणतन्त्रले मुलुकमा, खै के दियो लौ भन ? २

नेपाली जनता निमित्त यसले, चर्को निराशा दियो
इन्द्रेणी सपना दियो रङ दियो, मात्रै दिलासा दियो
आफ्नो राष्ट्रियता तिलाञ्जलि दियो, खायो पियो राशन
यो नाथे गणतन्त्रले मुलुकमा, खै के दियो लौ भन ? ३

ठूलो दीन दशा दियो ऋृण दियो, चर्को गरीबी दियो
भोको पेट दियो र दुर्दिन दियो, ईर्ष्या र ईबी दियो
मात्रै जाति घृणा दियो कल दियो, साथै दियो दुर्जन
यो नाथे गणतन्त्रले मुलुकमा, खै के दियो लौ भन ? ४

लाखौं लाख युवा विदेशिन दियो, ऊर्जा उतै सुम्पियो
बाँकीको जनशक्ति टाक्सिन दियो, लट्ठैत पारी दियो
सत्ता होड दियो लुछाचुँड दियो, आँफै लियो साधन
यो नाथे गणतन्त्रले मुलुकमा, खै के दियो लौ भन ? ५

०००
चितवन