कपडा
कुनै विपत्तिले मान्छे छट्पटिन थालेपछि, झोलाबाट, बोराबाट माकुराको जालो चिर्दै फुत्तफुत्त निकालिन्छन् कपडाहरू, गरिबीको उपहास गर्दै पीडितको उद्धारमा खटाइन्छन् कपडाहरू । एउटा प्रश्न छ मेरो, मैमाथि म मान्छे हुँ कि कपडा हुँ ?
भरत गुरागाईं बर्बरिक :
केही थान प्रयोग हुँदै आएका कपडा
झुण्डिएका छन् ह्याङ्गरमा,
जस्तो कि-
लहरामा झुण्डिएका हुन्छन् घिरौँलाहरू ।
सबै कपडाले कहाँ पाउँछन् र ह्याङ्गर !
अन्तिम भोजपछि
क्राइष्टले क्रसमा टाँगिनु परेझैँ
टाँगिन्छ भित्तोको काँटीमा र
दुष्ट खियाको सामना गर्छन् कपडाहरू ।
चल्न छोडेको
पुरानो टेलिभिजनमाथि सुत्छन्,
मानौँ त्यो टेलिभिजन
कपडा सुत्नकै लागि राखिएको हो त्यहाँ,
शोकेसमाथि मौन उभिएको
घुर्मैलो ऐनालाई छोपेर
आफ्नो अमूर्त अनुहार हेर्छन् कपडाहरू ।
ढोकाको पल्लामा झुण्डिएर
अतिथिहरूको स्वागत गर्छन्,
झ्यालको पल्लामा च्यापिएर
पल्लो घरको तमासा हेर्छन् कपडाहरू ।
पुराना हुँदै जान्छन्,
सुन्दरता हराउँदै जान्छन्,
मैलिन्छन्
च्यातिन्छन्
उध्रिन्छन्
दुलो पर्छन्;
झोलामा कोचिँदै जान्छन्
बोरामा ठोसिँदै जान्छन्,
निःश्वास गुम्सिएर कोमाको बिरामीझैँ
कच्याककुचुक हुन्छन् कपडाहरू ।
बाढी आउँछ
भूकम्प जान्छ
कुनै विपत्तिले मान्छे छट्पटिन थालेपछि,
झोलाबाट, बोराबाट
माकुराको जालो चिर्दै
फुत्तफुत्त निकालिन्छन् कपडाहरू,
गरिबीको उपहास गर्दै
पीडितको उद्धारमा खटाइन्छन् कपडाहरू ।
एउटा प्रश्न छ मेरो, मैमाथि
म मान्छे हुँ कि कपडा हुँ ?
०००
मोरङ