नेपाली हास्यव्यङ्ग्य अनलाइन पत्रिका

गायत्री परिरोशनी :

तिजको खाना राम्रो झानेको झ्वाइँ खट्टेले
दरखान बोलाका छन्, पाटी प्यालेसका भट्टेले ।
घिउ हालेको भातलाई दर भन्ने गर्थे पहिले
तान्ने, पिउने, छान्ने सबै दर भयो अहिले ॥

एक वर्षमा दुई महिना हो जम्मा तिज मनाउने
दुध, दही छैन सासु बज्यै वाइन खन्याउने ।
कमाउने नि हो, रमाउने नि हो, जमाउने नि हो
मात्ने हो, नाच्ने हो, मायाप्रेम गाँस्ने नि हो ॥

तिज सबै हाम्रो हो, रिस नगर हाम्रा पोइहरुले
डाह लाग्यो भने बीच—बीचमा नाच्न आउनु बरिलै ।
राजैले झैँ हामीले नि खान पिउन सबै सक्छौँ
नजर छड्के तिम्ले लाए, हामी अन्तै जान्छौँ बरिलै ॥

चौबन्दी र फरिया त चाहिन्न आजका नारीलाई
मन परेका दुई बोत्तल मिठो ल्याइदिनु बरिलै ।
गाउँ, गाउँ, बस्ती, बस्ती आएकै छ तिजको धमाका
दुई महिना भरि कसैको घरमा चुलो बल्दैन बरिलै ॥

खेतबारी सबै बाँझो भयो, बनमासा र बाँदर फलेको छ
दिनदिनै बेशी मेला लाग्छ, तीजको गीतको बरिलै ।
पुरानो भो वाइन, वियर, खुकुरी रम चालु छ
रातो, सेतो, कालो लेबल अर्को तिजलाई बरिलै ॥

०००
स्याङ्जा