नेपाली हास्यव्यङ्ग्य अनलाइन पत्रिका

डा. बमबहादुर जिताली :

जेठा छोरा चतुर्वेदी, माइला इन्जिनियर
साइला छोरा ओकिल छन् काइँलाचाहिँ डाक्टर ।
ठाइँला विद्या-वारिधि हुन् कान्छा भए चोर
सबै भए बेरोजगार चोर परमेश्वर ।

फटाहाले पालेका छन् ऐले परिवार
लुटाहाले लुटेका छन् गर्दै वारपार ।
लेखापढी जान्ने सुन्ने भएका छन् भार
बेकारका कारजस्ता बने सरकार ।

ईश्वर दाहिना भए पनि सम्धी हुनुपर्ने
सम्धी नाता परेपछि पद, पैसा झर्ने ।
साला, साली, फुपू पर्ने भएका छन् ठूला
छोरा, छोरी, बुहारीका बुबा छैनन् लुला ।

योग्यता र क्षमताले काम पाइँदैन
भन्ने छैनन् सेता नेता खाम चाहिँदैन ।
कुम्ल्याउन पाएसम्म दुनो सोझो पार्छन्
सीधासादा जनलाई सुम्ल्याएर मार्छन् ।

कोरोनाको कहरमा कुम्ल्याउन थाले
पन्छाउन, मन्छाउन रातो भाले ढाले ।
लकडाउन लगाएर भएका छन् डाउन
डाउन मात्र भए हुने, खाने भए टाउन ।

जनता छन् सास्तीको सास्तीमा
नेताचाहिँ मस्तीको मस्तीमा ॥

०००
‘जहाँ छन् बुद्धका आँखा’ (२०७८)