नेपाली हास्यव्यङ्ग्य अनलाइन पत्रिका

कल्पना अधिकारी :

जन्म्यौ श्रष्टा शरद ऋतुमा हे महाकाव्यकार
ओैँशीको त्यो शुभपल थियोे इन्दिराको तिहार
यो नेपाली कवि कलमका हे कला शिल्पकार
अर्पेँ श्रद्धा स्मृति दिवसमा वन्दना पुष्पहार ।१।

लक्ष्मी भन्थे तर सरस्वती पुत्र रै छौ नि भोले
लेख्यौँ मीठा कृति गहकिला पढ्न पायौं मजाले
कल्ले बुझ्ने प्रमिथस महाकाव्य चानेचुनेले
मीठो शाकुन्तल गहकिलो बुझ्छ विद्या हुनेले ।२।

कण्ठै पार्छन् मदन र मुना स्वादिलो काव्य मोती
मीठो मानी सरल कृति यो पढ्दछन् सातचोटी
कोही गाह्रा, सरल दुइटै काव्यका सूत्रधार
हाम्रो ठाडो शिर गरिदियौ धन्य हो त्यो निधार ।३।

देख्यौ तीर्थाटन मनुजका बोकिएका बिहान
ढोगीलाई कवि कलमले हान्दियौ व्यङ्ग्यवाण
यात्री भन्ने कृति रचिदियौ चोटिलो बेमिसाल
नौरङ्गी छन् रस गुणहरू काव्य उर्जा विशाल ।४।

बस्छौ वैकुण्ठ हरि घरमा कृष्णका खास मित्र
बाँचेका छौ कवि शरदकी कुञ्जिनी काव्य भित्र
बाँचोस् तिम्रो कवि यश दिगो जो गयौ स्वर्ग पार
स्रष्टा तिम्रो स्मृति दिवसमा वन्दना बारबार ।५।

०००