नेपाली हास्यव्यङ्ग्य अनलाइन पत्रिका

अनिल श्रेष्ठ :

अभियुक्त छाया

आफ्नै छाया
म सुतेको ओछ्यानबाट
बिस्तारै उठ्छ
र, मेरो घाँटी निमोठ्न
उद्यत छ

आजकल
म आफ्नै छाया विरुद्ध
लडिरहेको छु ।
००

अनावृत

आऊ
मेरो मस्तिष्कलाई सम्भोग गर
र, तिम्रो अबैध सत्तालाई
जन्म देऊ

मेरो मस्तिष्कसँग
तिमीलाई मनलाग्दो
खेल्न छुट छ

म यो राज्यको
एक निकृष्ट बुद्धिजीवी हुँ ।
००

प्राक्कथन

ढुङ्गालाई
फुटाएर कसैले घरको
जग हाल्यो
कसैले कुटेर
गिट्टी बनायो
कसैले छिनुले हिर्काएर
मुर्ति कुँद्यो

ढुङ्गाको
कसैसँग दुखेसो रहेन

ढुङ्गा
विद्रोही हुन्थ्यो भने
सायद मान्छेको घर बन्दैनथ्यो ।
००

नोस्टाल्जिया

कति मीठा सपना थिए
टिप्दै, बटुल्दै
पोल्टोमा राखें

ब्युँझेर हेर्दा
पोल्टो रित्तै थियो

थुक्क,
पोल्टो रित्तिने गरी
निद्रामा कस्तरी
दौडिएछु ।

०००
आँबुखैरेनी, गाेरखा