नेपाली हास्यव्यङ्ग्य अनलाइन पत्रिका

अनिल श्रेष्ठ :

भर्खरै
एउटा उज्यालो प्रवाहित भयो
अँध्यारो गुफाभित्र

शताब्दीऔं पुरानो हो गुफा
प्राचीन ओढार

हिंसाका आँखाहरु खेलाइरहेका छन् विषालु सर्पहरु
उज्यालोलाई झम्टिरहेछ स्तनधारी चमेरो
र विचित्र भावले
एकोहोरो हेरिरहेका छन्
बीभत्स काला माकुराहरु

भूगर्भविद्
र इतिहासका अन्वेषकहरु
तल्लीन छन्
कुनै नयाँ खोजको

अँध्यारोमा
कतै कुलकुलाउँदै गरेको आवाज
यो कुनै दलदल हो आदिम पोखरीको
जहाँबाट आलो तातो रगतको
बाफ उडिरहेछ

पर, केही पर
एउटा कुनामा लडिरहेको अस्थिपञ्जर
यो कुनै डेढ करोड वर्षअघिको
रामापिथेकसको अवशेष हो
र यी असङ्ख्य
छरिएर रहेका कङ्काल
भर्खरै हत्या गरिएका बीसौं शताब्दीका
मानव जिवाशेषहरु हुन्

भूगोलविद्
र इतिहासका अन्वेषकहरु
क्रमशः नोट गरिरहेका छन्
निजी डायरीमा
‘युगको यो क्रूर उदाहरण हो ।

०००