नेपाली हास्यव्यङ्ग्य अनलाइन पत्रिका

रामशरण न्यौपाने :

शिक्षा स्वास्थ्य समस्तका पहुँचमा आएन खै बेसमा
आयो रासन कार्डको न सुविधा हाम्रो यहाँ देशमा
जो छन् दक्ष युवा विदेश दगुरे खोज्दै ठुलो भैभव
घैँटोमा अब घाम लाग्छ कहिले जाग्छन् यहाँ मानव॥१

धोकेवाज अनेक मान पदमा घुस्दै गए बेसरी
पेवापात समान राष्ट्र धन यो खाए उछित्तो गरी
चिन्दैनन् अझसम्म लोक किन हो यस्ता ठुला दानव
घैँटोमा अब घाम लाग्छ कहिले जाग्छन् यहाँ मानव॥२

कोही बाघ बनेर देश जनता डस्छन् बिलोझैँ गरी
कोही गिद्ध बनेर लास जसरी ठुँग्छन् भुँडी बेसरी
रित्याए ढुकुटी र ब्रह्मलुट नै गर्दै गए झन् सब
घैँटोमा अब घाम लाग्छ कहिले जाग्छन् यहाँ मानव॥३

ओरालोतिर झर्छ देश जहिले देखिन्न राम्रो गति
भ्रष्टाचार गरेर उच्च तहमा पारे उछित्तो अति
कुच्याए ऋणले समस्त जनता कुम्याउँदै वैभव
घैँटोमा अब घाम लाग्छ कहिले जाग्छन् यहाँ मानव॥४

जान्दैनन् किन लोकले मुलुकको राम्रो नराम्रो पनि
कस्तो सान थियो यहाँ विगतमा कस्तो छ ऐले भनी
बस्छन् कंस पुजेर लोक किन हो भन्छन् उनै केशव
घैँटोमा अब घाम लाग्छ कहिले जाग्छन् यहाँ मानव॥५

०००
भक्तपुर