सुभाषचन्द्र देवकाेटागरिबको दिन आयो भन्छन्
नेता भए गाँउका ठालू उनकै छोरा ठूला, गरिबको दिन आयो भन्छन कता तिर होला ! हाम्रै काँधमा चडी चडी साहु नेता भयो, हाम्रै पसिना खाने मान्छे देश चलाउने भयो !
सुभाषचन्द्र देवकोटा :
दुःखदुःख मै बित्ने भयो यो जिन्दगी चोला
गरिबको दिन आयो भन्छन कतातिर होला !
जिन्दगीमा धेरै चोटी दोबाटोमा लडे
आफन्तकै हेला भए दुत्कारमा परे !
बाबु आमा मेर भन्थे साहुकै मल बोक्दा,
कसले गर्यो हामी जस्ता टुहुराको वास्ता !
स्कुलको आँगन मैले टेक्न कहिल्यै पाइन,
नयाँ राम्रो लुगाफाटो लाउन देख्न पाइन !
ज्वरो आउदा गोडा दुख्दा कसले बाबु भन्छ !
साहुको गाली, जुठा भाडा जिन्दगी नै यहि छ !
नेता भए गाउँका ठालू उनकै छोरा ठूला,
गरिबको दिन आयो भन्छन कतातिर होला !
हाम्रै काँधमा चडी चडी साहु नेता भयो,
हाम्रै पसिना खाने मान्छे देश चलाउने भयो !
हामी जस्तो दुखियाको पालो कहिले आउला,
गरिबको दिन आयो भन्छन् कतातिर होला !
०००
गाेरखा
