नेपाली हास्यव्यङ्ग्य अनलाइन पत्रिका

राम आचार्य ‘पुष्पप्रेमी’ :

लमतन्न सडक
सुनसान परिवेश
हामी दुई साथीको
गन्तव्यहीन यात्रा
साथी अघि हुँदा
म पछि
म अघि बढ्दा
ऊ पछि हुन्छ,
केवल संवाद मात्र
समानान्तर ।

उसले भन्यौ-
हौ ! साथी
यो डर पनि
कति हो कति,
एकान्तले निम्त्याउने डर
भइपरि आउने डर
यात्रा टुङ्गिने डर
थकान लाग्ने डर
बिसाउने चौतारी
नपाइने डर
पाइहाले ठाउँ
नपाइने डर,
शान्ति खल्बलिने डर
अशान्तिले पिरोल्ने डर
अभावको
भोकको
रोगको
शोकको अनि
भविष्य हराउने डर
अस्मिता लुटिने डर
मान्छेले मान्छे
नचिन्ने
वातावरणले पृथ्वी भुल्ने
अस्थित्व गुम्ने डर,
धम्की आउने
डनको डर
धनको डर
ढाँटिने
कुटिने
लुटिने र
खोसिने
सर्वत्र डरै डर ।

यात्रामा
मैले जति
डर देखेँ वा
अनुभूति गरेँ,
अगाडीको साथीलाई
कोट्याउँदै
प्रश्न गरेँ
हौ ! साथी
डर यथार्थ कि सत्य ?
उसको मलिन
अनुहारले नै देखाई
रहेको थियो
म भन्दा
उसलाई धेर डर
मैले सोचे
यो निडर र डरको
संसारमा
कुनै दिन
बेजोड प्रतिस्पर्धा
चल्नेछ
डरलाई पनि
डर लाग्नेछ
निडर अल्पमतमा
परे पछि
डरको सरकार बन्नेछ ।

०००
झापा