नेपाली हास्यव्यङ्ग्य अनलाइन पत्रिका

राम आचार्य ‘पुष्पप्रेमी’ :

आजकल यत्रतत्र सुन्ने गर्छु
गणतन्त्रको धुरीबाट निस्केका
परिवर्तनका ऐरावतहरू कराएको
एकतमासे आवाजहरू,
श्रृङ्खालाबद्ध भिन्न भिन्न आवाजमा
निर्लज्ज मुस्कुराउँछन माउतेहरू,
निम्सरा बस्तीहरू कुल्चिँदै
आश्वासनका कोरा नारा गुञ्जिन्छन र
बिहानी हुनु अगावै
सपनाहरु ब्युँझिदै मर्दै गर्छन्
थुप्रै भोक ओडेर निदाएका निन्द्राहरू ।

अधिकारको लडाईंमा
कानुनको अस्त्रले सुसज्जित
ती न्यायका सेनानीहरू
जालझेलका तोप वर्षाउँदै
न्यायघरलाई कफनको विक्री मण्डी बनाएर
गरिबीलाई जोखिने गर्छ
न्यायको तराजुमा ।
समानताको रणमैदानमा
मौन बस्छन् भिष्मपितामहहरू,
अनि त
रक्तबिज जस्तै पल पलमा
जन्मिरहेछन् शकुनिहरू ।
सत्ताका अगस्तिहरू शयर गर्न
सधैँ व्यस्त छन्
गणतन्त्रको महङ्गो सेतो हात्तीमा ।

०००
झापा ।