नेपाली हास्यव्यङ्ग्य अनलाइन पत्रिका

लक्ष्मण नेवटिया :

निम्त्याउदैन कसैले – तैपनि
वाह- वाह भन्नुस् कि छ्या छ्या
आँखामा आई नै हाल्छ कसिङ्गर ।

धनीको कसिङ्गरमा गाजलको तह हुन्छ,
गरीबको कसिङ्गरमा
सुँक्कसुँक्क आँसुको बह हुन्छ ।
बिहानै आँखा धोएर बगाइदिन्छन्
किन कसैले राख्दैनन् जोगाएर
दुःख-सुखको साथी – यो कसिङ्गर ।

क्षोभको होस् कि लोभको,
आउँछ सबैको एक जस्तै कसिङ्गर ।
नयन चितवनलाई दिन उज्ज्वलता,
बिहानै जसले सम्हाल्छ कमान ससम्मान,
ऊ हो कसिङ्गर ।

एक उज्यालो परिवर्तनको प्रतीक्षामा
विस्थापित गरिन्छ कसिङ्गर
तैपनि भोलि बिहानै
स्मृति-विस्मृति बीचको सन्धि भएर
फेरि आँखामा झुल्किन
आई नै पुग्छ कसिङ्गर ।
कसिङ्गरको न त कसैको आँखा
धमिल्याइरहने चाहना हुन्छ
न त आँखामा
बिझाइरहने चाहना हुन्छ,
फेरि किन बदनाम हुन्छ कसिङ्गर ?

०००
विराटनगर