नेपाली हास्यव्यङ्ग्य अनलाइन पत्रिका

घनश्याम रेग्मी :

पुर्खाहरू सबल राष्ट्र बनोस् भनेर
पानीबिना पनि लडे रणमा भिडेर
गिर्दो छ साख अहिले कुन गीत गाऊँ
यस्तो व्यथा मुलुकमा छ कता निदाऊँ ।१

सर्वोच्च यो शिखरको गरिमा बढाऊँ
यो राष्ट्रगान अझ सानसँगै म गाऊँ
यो राष्ट्रका विषय दोष तुरुन्त नास्न
इच्छा छ यो हृदयमा सबसाथ हाँस्न ।२

उल्लास यो समयले दिन सक्नुपर्थ्यो
आनन्दको पथ यता अझ खोल्नुपर्थ्यो
यो देशको असल उन्नति देख्न पाए
भन्ने थियो मनमनै तर हाय! हाय! ।३

नाङ्गा पहाड तनका कपडा झरेका
यस्ता अचम्म परिदृश्य हुने गरेका
भन्छन् अझै सुदृढ देश बनाउने हो
बर्सिन्छ आँसु कसरी म निँदाउने हो ।४

पानी सुकेर सब मूल कुवा इनार
छन् दीन रुग्ण घर गाउँ कथा हजार
छन् आसमा अब त फर्क गरी पुकार
फर्की छिटो सपुतले सपना सुधार ।५

सत्ता र स्वार्थ बटुली जन भाँड्न खोज्ने
काला विचार पर फाल प्रपञ्च रोज्ने
छन् गाउँ रिक्त अहिले टहरा र गोठ
लौ साहसी जन उठौँ र गरौँ अठोट ।६

यो देशमा असल पुष्प लता उमारूँ
सद्भाव शान्ति रसका बिरुवा म सारूँ
नेपाल नाम अब चम्किनु पर्छ फेरि
साहित्यकार पनि जाग नहोस् अँधेरी ।७

०००
हाल बैजनाथ १- चिसापानी, बाँके