नेपाली हास्यव्यङ्ग्य अनलाइन पत्रिका

हेमराज पन्त :

ढेवाले अभिमान फल्दछ यहाँ फुल्दैछ आडम्बर ।
ढेवा साधनमात्र हो बुझ सखे के सत्य भेटिन्छ र ॥
ढेवामा छ रवाफ मुर्ख जनको सम्मान ढल्दै गयो ।
ढेवाको गुणगानमा रत हुने के मुर्ख ज्ञानी छ यो ॥१

खोजी हेर्छु अतीतका विकटता सौभाग्य तिम्रो धन ।
पैसा बन्छ टिलो बुझे हृदयले उद्दण्ड केको झन ॥
पैसाकै गफगाफ हुन्छ दिनमा वा रातमा तर्कना ।
पैसा भूत सवारले मनुजमा देखिन्न नौलोपना ॥२

पैसा गर्छ विचार नष्ट जसको पाखण्ड कैयौँ छरी ।
पैसा जान्छ सधैं उडी पवन झैँ यो चैतको हुण्डरी ॥
पैसामा छ विषाक्त क्रोध सपना पैसा तिमी बैगुनी ।
नाता,प्रेम,दया,विवेक मनको पोल्दैछ पैसा खुनी ॥३

छाया शीतल शान्ति मिल्दछ भनेके काम खै बोटको ।
थप्दै जान्छ सदैव कष्ट धनले धान्थ्यो कहाँ चोटको ॥
बोलीमा छलछाम सुन्दछु सधैँ आचार गिर्दै गयो ।
जालीमात्र बनेछ मानव कठै ! सर्वोच्च ढेवा भयो ॥४

एक्लै गर्छ बखान किन्तु धनको लाखौं सयौं लाखको ।
यो सम्मान चरी बनी अधमरी सुन्दै कुरा चाखको ॥
देखे ज्ञान र योग्यता रकममा सुस्तै बसी गेहमा ।
कालो सोच बिचार देख्छु धमिलो आलस्यता देहमा ॥५

तारा झार्छ हजार लाख गफले मीठा कुरा क्षेमका ।
आँखाले रवि, चन्द्र यी गगनमा कुर्दै बसे प्रेमका ॥
अल्छी मानवका कुरा अझ बढे ठग्ने अनेकौं कला ।
भोका, दीन, गरीब चुस्छ सहजै रेटेर घाँटी गला ॥६

०००
पाटन २ सिलङ्गा, बैतडी
हालः पहलमानपुर, कैलाली