नेपाली हास्यव्यङ्ग्य अनलाइन पत्रिका

लक्ष्मण नेवटिया :

लडाइदियो छिर्के लाएर- १

ठानेको थिएँ आएको होला खुट्टा ढोग्न भनेर
झन् लडाइदियो छिर्के लाएर।
सोचेको थिएँ
आएको होला मलाई बोक्न भनेर
झन् खसाइदियो खोंचमा पुर्‍याएर।

को छ मित्र ? को छ शत्रु ?
छुट्याउनै गाह्रो भइसक्यो अहिले,
सोचेको थिएँ आएको होला
सहयोग गर्न, केहि ल्याएर
झन् सिध्याई गयो
जो थियो घरमा त्यो पनि चपाएर।

प्रस्ताव सर्वसम्मत स्वीकार- २

उनको प्रस्ताव सर्वसम्मतिले
गरियो स्वीकार
बढ्दा खल्तीको भार।

उनको भनाई मानिन थाल्यो
अहिले वजनदार
बढ्दा उनको पदको भार।
सज्जनले नै अचेल
सहनु पर्छ दुर्जनको मार।

चल्ती हुनेको चलिहाल्छ
जस्तोसुकै गल्ती
झन थपिन्छ घाँटीमा
फूलको हार।

०००
विराटनगर