नेपाली हास्यव्यङ्ग्य अनलाइन पत्रिका

कृष्णप्रसाद गौतम :

आज नयाँ वर्ष सुरु भएको छ
जताततै शुभकामना साटासाट हुँदैछन्
व्यक्ति व्यक्ति बिचमा,
संस्था बिचमा
हरेक रेडियो र टिभीले सुखद नयाँवर्षको
कामना गरिरहेका छन् ।
प्रत्येक घरका भित्ताहरूमा
झुन्ड्याइएको छ रङ्गीन नयाँ क्यालेन्डर
आज पुरानो हटाइएको छ
सजाइएको छ नयाँ क्यालेन्डर
जहाँ लेखिएको छ-
नयाँ वर्षको शुभकामना !
थुप्रै रङ्गीन विज्ञापनका साथमा ।

पण्डितजी पल्टाउँछन्
र गणना गर्छन्-
प्रत्येक महिनाका औँसी
रुद्री, ब्रतबन्ध, बिहेका साइतहरू
आफ्नो नोटबुकमा टिपोट गर्छन्
अनि
बनाउँछन्, वर्षभरिको कार्य योजना
उनलाई भ्याइ नभ्याइ छ ।

मन्त्रीजी क्यालेण्डर पल्टाउँछन् खोज्छन्-
शिलान्यास मुहूर्त र दिवसहरू
अनि
बनाउँछन् शिला राख्ने र रिबन काट्ने योजनाहरू
समय पुग नपुग छ ।
धैर्यसाथ पर्खिन्छन् गणतन्त्र दिवस
र बनाउँछन् –
आफन्त अपराधीहरूको
उन्मुक्तिको लामो सूची ।

व्यापारीहरू गन्दैछन् चाडपर्व आउने दिनहरू
दसैँको सुअवसर
र नयाँ मूल्य सूचीको तयारीमा व्यस्त छन् उनीहरू ।
प्रशन्न देखिन्छन् ।

किशोर किशोरी खोज्दै छन्
प्रणय दिवस
अनुहारमा अनौठो उत्तेजना र सुन्दर विम्वहरू नाच्छन् ।

कर्मचारीले बिदाका दिनहरू जोड्दै छ
पोहोर सालभन्दा अहिले
पाँच दिन बिदा थपिएछन्
ऊ मुस्कुराउँछ ।

मेरा बा हातको कोदालो आँगनका छेउमा
हतारहतार राख्दै
पसिनाले निथ्रुक्क भिजेको भोटो फेर्नै नभ्याई
पल्टाई पल्टाई हेर्छन् भित्ताको क्यालेन्डर
देख्छन् – सुकिलामुकिलाको हूलले
पन्चेबाजाका तालमा गमलामा धान रोपिरहेको
अनि गलाभरि टम्म बिउको माला
बा निकै प्रफुल्लित देखिन्छन् र खोज्छन्
मल दिवस
भेट्दैनन् ।
उखु दिवस खोज्छन्
त्यो पनि भेट्दैनन्
थुचुक्क भुइँमा बस्छन् बा
कर्णाली यात्रामा तीन छाक अलिनो खाँदाको
झझल्को चलचित्रझैँ आँखाअगाडि सलबलाउँछ
अनि फेरि खोज्छन् नुन दिवस
त्यो पनि भेटेनन् ।
अनायास बा लामो सुस्केरा छाड्छन्
टिठलाग्दो नजर परपर हुत्याउँछन् र बर्बराउँछन् –
“खै ! यो वर्ष पनि बेलैमा मल हालेर बाला झुलाउने
तिमीहरूलाई दसैँमा मनपर्दा लुगा किनिदिने
अनि
परार उखु लगाउँदा बैङ्ककर्जा
तिर्ने दिन नआउने भए छोरा ! धितो राखेको
घरकित्ता यसै जाने भो । धिक्कार ! तँ नयाँ वर्ष भनाउँदोलाई !!”

मलाई नयाँ जिज्ञासाले दिमाग कोपर्न थाल्छ,
“खै ककसका लागि हो यो नयाँ वर्ष ?”

०००
२०८१/०२/११
इटहरी, सुनसरी ।