नेपाली हास्यव्यङ्ग्य अनलाइन पत्रिका

लक्ष्मण नेवटिया :

ससुरालीबाट उपहार प्राप्त
सस्तो खैरो च्यादर उर्फ दोसल्ला
घनश्यामले रामलाई
टोल समारोहमा भिरायो ।

रामले समाजसेवी हरिरामको
सम्मान समारोहमा
“दानवीर” को उपाधि सहित
उसको काँधमा झुण्ड्याउन भ्यायो ।

हरिरामले फेरि कार्यालयमा
बेकाम भएर अवकाश लिएका
परशुरामको बिदाइका बखत
माला सहित दोसल्ला चढायो ।

परशुरामले सामाजिक अभियन्ता भनि
जयरामको काँधमा पुर्‍यायो
जयारामले “विशिष्ट व्यक्तित्व”को उपाधि सहित
घनश्यामलाई गालामा
अबिर लाउँदै त्यही दोसल्ला ओढायो ।

घनश्यामको घरबाट
हिँडेको दोसल्ला
कैयौँलाई गरेर सम्मानित
अश्वमेध यज्ञको घोडा झैँ
फेरि घनश्यामकै काँधमा फर्केर आयो ।

तब बल्ल बुद्धि पलायो,
मानिसलाई राख्न चलायमान
दुई सय पर्ने यो दोसल्लाको
मान्नै पर्छ “महान् योगदान” ।

०००
विराटनगर