नेपाली हास्यव्यङ्ग्य अनलाइन पत्रिका

होम सुवेदी :

दुष्कर्मी भ्रष्टका भिन्नै हुन्छन् संसारमा कला
खिर्राका रुखमा फल्छन् तिनका लागि सुन्तला ॥

न सम्बन्ध कतै हेर्छन् न आमा बाबुको मुख
उनका लागि हो मान्छे पैसा फल्ने ठुलो रुख ॥

जता पैसा उतै जान्छ भ्रष्टजीव घरी घरी
त्यसको धर्म नै हुन्छ बाटाको बाबियो सरि ॥

घुम्ने मेच जसै पायो धपक्क भ्रष्ट बल्दछ
उसको हातमा मानौँ जादूको छडी चल्दछ ॥

पैसामा भन्कने गर्छ नभए त्यो गनाउँछ
चालिसै नपुगी मानौँ भत्ता खाने बनाउँछ ॥

पैसा हो उसको नाता पैसाकै अन्ध भक्त छ
के हुन्न उसका साथ जे पनि गर्न सक्तछ ॥

उसकै जादूले गर्दा पूज्य मान्छे यहाँ बने
सेकुवा दारुले टन्न भुँडी भर्न सक्यो भने ॥

आयु लिङ्ग सबै फेर्ने क्षमता भित्र आउँछ
छोलाई अझै बाबु भन्दा जेठो बनाउँछ ॥

जता मल्खु उतै ढल्कु आदर्श छाँट्न सक्छ
छोराछोरी सबैलाई सहजै ढाँट्न सक्तछ ॥

चोरकै लागि यो मेरो कविता भो समर्पण
चोरका खन्तीको धेरै नगरूँ अब वर्णन ॥

०००
भद्रपुर, झापा