नेपाली हास्यव्यङ्ग्य अनलाइन पत्रिका

गोपाल काफ्ले :

“खानपिन भुल्याइदिन्छ
महामूर्ख तुल्याइदिन्छ
जोगाएर राखेको थोरै
इज्जत खुइल्याइदिन्छ”
मोबाइलको खराब लत
कसैमा नबसोस् हतपत !

“समयको हेक्का हराइदिन्छ
आफन्तलाई पराई गराइदिन्छ
मर्नु न बाँच्नुको जिन्दगी बनाई
उस्तै परे बसाइँ सराइदिन्छ”
मोबाइलको खराब लत
कसैमा नबसोस् हतपत !

“मोबाइलकै दास बनाइदिन्छ

चाकरसुसारे खास बनाइदिन्छ
तपाईँले आफूलाई जिवित ठाने पनि
तपाईँलाई जिउँदो लास बनाइदिन्छ !”
मोबाइलको खराब लत
कसैमा नबसोस् हतपत !

“आफ्नी श्रीमतीसँग फुटाइदिन्छ
अर्काकी प्रेमिकासँग जुटाइदिन्छ
इज्जत श्री – सम्पत्ति लुटाइदिन्छ
नातासम्बन्ध सजिलै टुटाइदिन्छ”
मोबाइलको खराब लत
कसैमा नबसोस् हतपत !

“पढ्नेको पढाइ बिगारेको छ

विसङ्गतिले नराम्ररी लघारेको छ
फोटोकै लागि आधा रातमा
थोत्रो अनुहार सिँगारेको छ”
मोबाइलको खराब लत
कसैमा नबसोस् हतपत !

“भनेको छ सामाजिक सञ्जाल
भित्र पसेपछि जन्जालै-जन्जाल
एकादुई मात्र हुन्छन् मालामाल
बुद्धि र सम्पत्तिले बन्दछ कङ्गाल”
मोबाइलको खराब लत
कसैमा नबसोस् हतपत !!

“अरुलाई मोबाइल नचला भन्या छ
आफू त्यसैमा ठसठसी कन्या छ
छोराछोरीलाई पढ् – पढ् भनेर
आफू मोबाइकै एडिक बन्या छ”
मोबाइलको खराब लत
कसैमा नबसोस् हतपत !

“लाइक, कमेन्ट, सेयर र भ्यु
गरेन भनेर खोज्या छ निहुँ
अनिद्राले बिग्र्या छ जिउ
त्यही बन्या छ झगडाको बिउ”
मोबाइलको खराब लत
कसैमा नबसोस् हतपत !

“आजको ‘मोबाइल’ र ‘नेता’
दुवै जनताका पीडा र व्यथा
एउटै गुण छ दुवैमा सिध्याउने
यिनले कहिले मार्छन् के थाहा ? “
नेतागिरिको खराब लत
कसैमा नबसोस् हतपत !!

०००
सिन्धुली
हाल भरतपुर, चितवन