नेपाली हास्यव्यङ्ग्य अनलाइन पत्रिका

गोपाल काफ्ले :

जङ्गलराजको राजधानीमा सूर्योदयसँगै चटके शेरको सवारी भयो
मध्यान्नतिर झन् ठूलो छेपारे शेरको सवारी भयो !
सूर्यास्तमा पटके शेरको सवारी भयो
बाँदर, लङ्गुर ढेडु, सुँगुर,
बङ्गुरहरूको अगुवाइमा
काग बाज चीलहरूको सम्मेलन
जङ्गलराजको राजधानीमा चलिरहेको छ ।
मृग, कस्तुरी भँगेरा परेवा र मयुरहरूको कसरी सिकार गर्ने भनेर
तिनलाई कसरी सताउने भनेर
तिनलाई कसरी भोग गर्ने भनेर कहिले दक्षिणबाट
कहिले उत्तरबाट र
कहिले सुदूर पृथ्वीको पल्ला छेउबाट
जोगीजस्ता चिम्सा र
सेता मदारीहरूले आ-आफ्ना
स्वार्थका डम्फु जोडजोडले बजाइरहन्छन् …
सिंह गुफामा बाँदरहरू नाङ्गो नाच नाचिरहन्छन् ….
घरी सिकार हुन्छन् .. शेरहरू नै
घरी सिकार गर्छन् … शेरहरूका
शेरहरूले नै ..
भेडाहरू हेरिरहन्छन्…
पीडकहरूको कुकर्ममा पनि
समर्थनको ताली बजाइरहन्छन् …!
घृणित कर्ममा पनि
थपडी मारिरहन्छन्
भेडाहरू… पुस्तौंपुस्ता भ्याभ्या… गरिरहन्छन्… आफ्नै अज्ञानतामा… !

०००
सिन्धुली, हाल हेटौंडा