मन पराउनेलाई तन दिए कसो होला ?
रापिलो यौवन ओरालो लाग्छ एकदिन अस्ताउँदो सूर्यसरी ... आफूले हैन आफूलाई मन पराउनेलाई तन दिए कसो होला ?
गोपाल काफ्ले :
‘पुरुष बलात्कारी हो’ लाई अपवादमा गन्दिए कसो होला ?
‘रावण रामभन्दा विद्वान् थिए’ यसो भन्दिए कसो होला ?
यहाँ प्रेमीको जिब्रो टोकेर छिनाउने प्रेमिका पनि देखियो
रक्सीको नसाले अनजानमा भएको मान्दिए कसो होला ?
कोदोको कोदै तिर्छु र सात जुनीसम्म पिर्छु भन्नेका अगाडि
चुपचाप लाटो भई उसका अमृतवाणी सुन्दिए कसो होला ?
परोपकारी सदा भिखारी भन्ने नेपाली आहान नै छ
माया माग्ने मायालुलाई खुसुक्क भित्री मन दिए कसो होला ?
उनको धन मेरो धन मेरो धन उनको धन कुरा मिले एक मन
यति भन्दै आफ्ना सारा भए – भरको धन दिए कसो होला ?
रापिलो यौवन ओरालो लाग्छ एकदिन अस्ताउँदो सूर्यसरी
आफूले हैन आफूलाई मन पराउनेलाई तन दिए कसो होला ?
०००
हेटौंडा, हाल चितवन