नेपाली हास्यव्यङ्ग्य अनलाइन पत्रिका

नारायण ज्ञवाली :

कहिले यता कहिले उता, भोट हाल्न भन्छौ
गठबन्धन वनाएर, सिट सङ्ख्या गन्छौ
परीक्षण गर्दा दल, जनप्रिय कुन्छ ?
जनमत वुझ्न सके, बल्ल थाहा हुन्छ ॥

भोट साट्दा चुनावमा, जनतालाई सास्ती
त्यै जनतालाई झुक्यायर, नेतालाई मस्ती
चुनावमा गठबन्धन, एउटासँग गर्‍यो
सरकारमा समीकरण, अर्कोतिर सर्‍यो ॥

दुई महिनामै समीकरण, बदलिन्छ फेरि
जनताहरू हैरान भए, दलको चाला हेरी
फेरिएको समीकरण, चल्छ एक वर्ष
समिकरण बद्लिदा, छैन कत्ति हर्ष ॥

व्यवस्था त बदलियो आन्दोलनको भरमा
अवस्था त वद्लिएको, छैन कुनै घरमा
काण्डै काण्ड छिपेका छन्, सुशासन छैन
यो व्यवस्था नेतालाई भो, जनतालाई हैन ॥

छिनछिनमा बदलिन्छ, यहाँ समीकरण
स्वार्थै स्वार्थ ढाँट छलमा, हुन्छ ध्रुवीकरण
पुराना र नयाँ पार्टी, छैनन् फरक केही
बोत्तल मात्र फेरिएछ, रक्सि पर्‍यो त्यही ॥

द्वन्द्वै द्वन्द्व अस्थिरता, विभाजित छन् दल
खप्पिस छन सधैँ हुन्छ, गर्छन् कपट छल
सत्तापक्ष प्रतिपक्ष, एउटै समीकरण
ठुला दल एकै ठाउँमा, छैन उदाहरण ॥

दक्षिणपन्थी कोही भन्छन्, कोही अवसरवादी
आरोप प्रत्यारोप गर्छन्, दलाल पुँजीवादी
नैतिक धरातल बिर्सी, जसो पनि गर्ने
सोझा साझा नेपालीलाई, भ्रम मात्र छर्ने ॥

कालो पनि सेतो हुने, मिल्दासम्म स्वार्थ
छेपारे यो प्रवृत्तिको, छैन कुनै अर्थ
जताततै निराशा छ, सन्तोष कतै छैन
वेथिति र निराशाले, आशा जाग्ने हैन ॥

०००
लोकन्थली, भक्तपुर