नेपाली हास्यव्यङ्ग्य अनलाइन पत्रिका

नारायण ज्ञवाली :

इमान बेइमान के हो ? बुझेर बुझ पचाउँछु
स्वार्थ मेरो मिलाउनलाई सबैतिर छच्चाउछु
जालझेल तिगडम गरी सत्ता मैले बचाउँछु
कहिले केही बिग्रिएमा बबन्डर मच्चाउँछु ।

शत्रु भनी लडाइँ लडेँ सबै मित्र भइसके
सत्ताको स्वार्थमा मिल्न शत्रु भन्ने आइसके
सत्ताको गुलियो चुस्कीसँगै बसी लगाइसकेँ
भुलेर हिजको बाटो निष्ठा सबै बगाइसकेँ ।

समावेशी कुरा गर्छु सबैलाई भुलाउँछु
राख्छु सबै वरिपरि आश्वासनले डुलाउँछु
बेपत्ता र सहिदका कुरा गर्छु जोडैसँग
कुरा गर्छु चर्को चर्को बनाउँछु सबै दङ्ग ।

कुरा फेर्छु छिनछिन सत्तामा टिक्नुपर्दछ
न्याय कानुन छिन्न भिन्न कसले पो के गर्दछ ?
बोल्न सक्छु मिलाएर सत्ता मेरो वरिपरि
कहिले वारि कहिले पारि बिताउँछु दिन यसैगरी ।

कहिले दबाब बढाएर डर दिन्छु तर्साउँदै
बितेका घटनालाई सम्झीसम्झी दर्साउँदै
के गरेँ के गर्छु मैले थाहा छैन आफैलाई
जानेको छु रङ्ग फेर्न अघि सार्छन् सबै आई ।

अघिपछि गाडी गुड्छन् बजाउँदै साइरन
सुकिला मुकिला लुगा मन लाग्ने लाइरहन
सुरक्षाको चिन्ता छैन पुलिस सेना वरिपरि
सत्ताबिना बाँच्नु पर्ला चिन्ता लाग्छ घरि घरि ।

०००
लोकन्थली, भक्तपुर