नेपाली हास्यव्यङ्ग्य अनलाइन पत्रिका

भोलानाथ सुवेदी :

साह्रै गाह्रो पर्न थाल्यो पाल्न यो नङ
पालिस लगाई दाँज्ने गर्छ अरुअरुसँग ।
काट्न पनि मान्दैन पाल्नुपर्छ भन्छ
सरकारको ढुकुटीमा हात हाल्छु भन्छ ॥

कहिले जान्छ बालुवाटार कहिले खुमलटार
ढाड कन्याई फर्कन्छ रे उसले बारम्बार ।
विदेशी दूतावासमा छिर्ने गर्छ कहिले
शासकलाई चिमोटेर थला राख्छ जहिले ॥

च्यात्ने गर्छ मोजा अनि सिरकका खोल
घरभित्रको व्यवस्था पार्छ डामाडोल ।
सरकार पनि डगमगाउँछ देखे लामो नङ
दरबारभित्र पस्यो भने पार्छ रे तमाम ॥

करोडौंको कमिसन असुली थमाउँछ
अस्थिर स्वभाव हुनेसँग खुबै रमाउँछ ।
सत्ता पनि घुर्की लगाइ पल्टाउने कुरा
ठूलो माछाको काँध चढी खान्छ रे भुरा ॥

०००
काठमाडौं
(९८४३०५४१६१)