लक्ष्मण नेवटियानयाँ एयरगाडा
नयाँ एयर गाडा जहाजको फाइदा उठाउनु होस् आफू पनि आउनु होस् अरूलाई फकाई ल्याउनु होस् । एउटा अन्तिम कुरा सुन्नुस् साफै आफ्नो सुरक्षा गर्नु पर्नेछ आफै ।
लक्ष्मण नेवटिया :
खुल्यो ! गज्जबको..
नयाँ एयरगाडा
समुचित सुविधा
उचित छ भाडा
पाल्नु होस् सेवाको
मौका दिनुहोस्
आधुनिक आकर्षक
सुविधा लिनुहोस् ।
एयरपोर्ट आउन हाम्रै
गाडीमा गुड्नु होस्
सपना रंगीन बनाउन
माथिमाथि उड्नु होस् ।
विदेशमा छापिएको नयाँ
सुरक्षा प्रोटोकोल ।
तपाईंको तौल जति भए
गर्दैनौं कुनै झोल ।
ठिक समयमा हुन्छ
हाम्रो जहाज प्रस्थान
अवतरण गरिँदा तर
सम्झनुस् भगवान ।
गर्दैनौँ कतै कुनै छल
मुस्कानसँगै शीतल जल।
तपाईंका गुनासाको
तुरुन्तै निकाल्छौं हल ।
हाम्रो नयाँ एयरगाडाका,
जहाज रङ्गिएका नयाँ ।
सेटिङ सबै नयाँ
फिटिङ पनि नयाँ ।
विमान चालक नयाँ ,
विमान परिचारिका नयाँ
“इन्जिन उमेर पच्चीस”को
बाहेक सबथोक नयाँ ।
नयाँ एयर गाडा जहाजको
फाइदा उठाउनु होस्
आफू पनि आउनु होस्
अरूलाई फकाई ल्याउनु होस् ।
एउटा अन्तिम कुरा सुन्नुस् साफै
आफ्नो सुरक्षा गर्नु पर्नेछ आफै ।
०००
विराटनगर
भित्री रूपमा मार्मिक भाव समाहित तर बाहिर भने व्यङ्ग्यको लेपन गरिएको सान्दर्भिक अनि चोटिलो रचना!