नेपाली हास्यव्यङ्ग्य अनलाइन पत्रिका

हरिप्रसाद घिमिरे :

असाध्य भो विकासले हिमाल चुम्छझैँ भयो
रहेन दुःख देशमा अमेरिका सरी भयो
सुरक्ष बालबालिका परेन मर्न जङ्गल
न भोक प्यासका दुखी सुमङ्गलै सुमङ्गल ॥१ ॥

परेन मर्न आर्तले छ अस्पत्ताल आर्तको
हुँदैछ काम देशमा निस्वार्थ नै निस्वार्थको
बराबरी भए यहाँ न जात पात भेद छ
न दुःख भो यहाँ भनी विशेष खाल खेद छ ॥२ ॥

प्रशस्त बालबालिका कलेज सम्म टम्म छन्
छ आर्तको मुहारमा खुसी हुँदा अचम्म छन्
झरेन लास देशमा परेन दुःखको घडी
विकास त्यो पहाडमा हिमालमा छ झन् बढी ॥३ ॥

जहाज उँड्दछन् यहाँ परेन जल्न मानव
सुधी सुधी मनुष्य छन् हुँदैन दुष्ट दानव
छ राज्य राम राज्यझैँ हुँदैन भोक प्यासमा
धनी धनी पहाडमा छ आर्त केन्द्र सम्ममा ॥४ ॥

प्रपञ्च पञ्चको थियो अखण्ड देश भैदियो
सुखी भए दुखीहरू ढलेन देशको मियो
किलाहरू सबै रहे ढलेन देशको गजा
लुटेन देश शत्रुले टुटेन देश झन् मजा ॥५ ॥

०००
नागार्जुन ३, आदेश्वर