नेपाली हास्यव्यङ्ग्य अनलाइन पत्रिका

जगदीश्वर पोखरेल :

लुटेरा छन् धर्ती दिनदिन लुटे घातकीले
धसेका दाह्रा छन् छलफल गरी पातकीले
लिए सत्ता भत्ता कति छल गरी टन्न खाए
अहो ! काला कौवा मुलुक भरका सल्बलाए ॥१

खुराफाती गर्ने चतुर तरिका देखिँदै छ
खुराफाती चाला प्रतिदिन बुझी लेखिँदै छ
कुरा राम्रा गर्ने कपट दिलका खल्बलाए
अहो ! काला कौवा मुलुक भरका सल्बलाए ॥२

बजाए बज्ने हो टिनिनिनि सदा घन्ट रालो
सबैले चिन्दै छन् कति दिन लुकोस् खोट कालो
लखेट्दै घाती छन् भुवन भरमा चल्मलाए
अहो! काला कौवा मुलुक भरका सल्बलाए ॥३

विदेशी बोल्दै छन् हृदय घटमा लाज छैन
उतैको खाँदै छन् तलब यिनले गर्न चैन
चल्यो हल्ला सारा मुलुक भरमा डल्पलाए
अहो ! काला कौवा मुलुक भरका सल्बलाए ॥४

हिमाली मालीको जनम धरती स्वर्ग जस्तो
बिघाती घातीको करतुत खुल्यो दुष्ट कस्तो
हकी छैनन् स्वार्थी कलुष दिलका अन्कनाए
अहो ! काला कौवा मुलुक भरका सल्बलाए ॥५

०००
पाउँदीबजार, लमजुङ