नेपाली हास्यव्यङ्ग्य अनलाइन पत्रिका

महादीप पोखरेल :

जुका- थरीथरीका जुकाहरू
कुनै साना जुका, कुनै ठुला जुका
कुनै काला जुका,कुनै खैरा जुका
अनि कुनै राता र पहेला जुकाहरू
कुनै पानी जुका, कुनै पेटमा पर्ने जुका
अर्काको रगत पिएर बाँच्ने परजीवी जुकाहरू
केही अल्छी, केही धेरै सक्रिय जुकाहरू
पहरामा टास्सिएर बसेका जुकाहरू
रुखका पात, बोक्रामा निदाएर बसेका जुकाहरू
जब कोही त्यही बाटो हुँदै आउँछन्
बिस्तारै तिनको ज्यानमा खसेर रगत चुस्ने जुकाहरू
जन्तुको पेट,आन्द्रामा पर्ने जुकाहरू
केही त रगतको नली हुँदै दिमागसम्म पुग्ने
रगत चुस्ने मात्र होइन, मान्छेलाई बौलाहासम्म बनाउंँछन जुकाहरू
बर्षातमा घाँस तिर र ढापमा पनि पाइन्छन जुकाहरू
ती चुसाहा जुकाहरू
शरीरको भित्रै बाट रगत तान्ने जुकाहरू
कहिले हराउने कहिले झ्याप्पै देखिने जुकाहरू
तर आजभोलि जुका विशेषज्ञहरू पनि हैरान रहेछन्
किनकि
धर्तीमा भेटिएको छ नयाँ प्रजातिका जुकाहरू
पहिलेका जुका भन्दा चुसाहा र निर्दयी जुकाहरू
मानिसको रगत खुब मन पराउने परजीवी जुकाहरू
नछोइकनै र थाहा नदिइकन मान्छेको रगत चुस्ने जुकाहरू
जमिनमा ढलेर नमर्दासम्म थाहै नदिने जुकाहरू
मानिसको रगत वेगले तान्दैछन यी जुकाहरू
हड्डी र नसाहरू क्रमशः खाली पार्दैछन् निर्दयी जुकाहरू
मान्छेको रगत मात्र होइन सिङ्गै देश, पनि चुसिरहेका छन् जुकाहरू
अनि क्रमशः पृथ्वीका प्राकृतिक श्रोतहरू पनि सिध्याउने छ यी जुकाहरू
कुर्सीमा बसीबसी काम फत्ते गर्ने जुकाहरू
रिमोट कन्ट्रोलबाटै परिचालन हुने जुकाहरू
यिनै हुन् मान्छेको भेषमा आएका नयाँ प्रजातिका जुकाहरू
हरेक ५ वर्षमा हाम्रो घरघरमा भोट माग्न आउँछन् जुकाहरू
आफ्नै रगत चुसाउन, देशको प्राण रित्याउन भोट दिन्छन मान्छेहरू
आफ्नो सम्पुर्ण पन सिध्याउँदै छन् मान्छेहरू
अहिले शहर, बजार, गाउँघर जताततै
सल्बलाइरहेका छन् नयाँ भेरियन्टका जुकाहरू
राता, पहेला, खैरा टाउके जुकाहरू !!!
कुर्सी र सत्ताका अति प्रिय जुकाहरू !!!

०००
गोदावरी, ललितपुर