नेपाली हास्यव्यङ्ग्य अनलाइन पत्रिका

केशव ज्ञवाली :

जुन बेला
देशभित्र
तिमी एउटा मान्छे खोजिरहेका थियौ
त्यस बेला
म आफैँभित्र
एउटा देश खोजिरहेको थिएँ
जहाँ माछापुच्छ्रेको छाँया फेवातालमा पर्छ
जहाँ बुद्धको लुम्बिनी र मेरो घर छ ।

खुब पढाइ हुन्छ रे
विश्वविद्यालयतिर
तिम्रा चेतनाका गाथाहरूको
तर
त्यहाँ म कहाँनिर छु र
देश कहाँनिर छ
म तिम्रा आविष्कारहरूमा खोजिरहेको छु !

मान्छेहरूको भिडमा
एउटा मान्छे त तिमी पनि हौ तर
देशभित्र तिमी कहाँनिर छौ र
तिमीभित्र देश कहाँनिर छ
म तिम्रो नागरिकतामा खोजिरहेको छु !

अहिले तिमी
देशको घुम्ने कुर्सीमाथि छौ तर
त्यहाँ म कहाँनिर छु र
देश कहाँनिर छ
म तिम्रो सरकारमा खोजिरहेको छु !

०००
रूरूक्षेत्र, गुल्मी
हाल – सूर्यविनायक, भक्तपुर