नेपाली हास्यव्यङ्ग्य अनलाइन पत्रिका

केशव ज्ञवाली ‘आगत’ :

जो पहिला पनि
कसैको कुरा काट्थे
तिनै
कुरा काट्नेहरू
अचेल झनै बढेका छन्
तिनकै पछि लागेर
मैले पनि
कसैको कुरा काट्न
के थालेको थिएँ
बन्चरो आफ्नै घुँडामा पर्‍यो !

कति धेरै कामहरू बाँकी छन्
जुन
हिजै गरिनुपर्थ्यो तर
आज पनि गरिएनन्
मान्छेलाई भन्यो भने
कुरा चपाउँदै
कसैले भ्याइएन भन्छ
कसैले जानिएन भन्छ
तर
अरुको कुरा काट्न भने
जत्ति पनि समय, र
खुब सिपालु छन् मान्छेहरू !

पहिला चित्रगुप्त अरु नै काम गर्थे
अहिले उनको
एउटा पसल पनि छ
कामको बोझ बढेकाले
आकर्षक तलब र
अन्य थप सुविधासहित
पसलमा फलाम काट्ने तर
अरूको कुरा नकाट्ने
आवश्यक मान्छेको
एउटा विज्ञापन गरे उनले तर
अहिलेसम्म
कसैले पनि आवेदन गरेको छैन !

०००
रूरूक्षेत्र, गुल्मी
हाल- सूर्यविनायक, भक्तपुर ।