नेपाली हास्यव्यङ्ग्य अनलाइन पत्रिका

ठाकुर बेलवासे :

फाँसीमा झुण्ड्याए  पनि
क्रुर काेर्राले कायल पारे पनि
अदालतमा लछारपछार गरे पनि
चरम अपमान गरेर संसार डुलाए पनि
सत्यलाई कुनै फरक पर्दैन !

फूलकाे मालाले गला भरिदिए पनि
फूलैफूलमा सुताए पनि
अथवा
प्रशंसाको यज्ञ नै लगाएर अखण्ड पूजा गरे पनि
सत्यमा नयाँ कुनै परिवर्तन आउँदैन !

शासकहरूले बेलाबेला
सत्यलाई कठघरामा राख्ने प्रयास गर्छन्
कठाेर सजाय दिएर काबुमा राख्ने अनेक प्रविधि अपनाउँछन्
कुनै बिना प्रतिकार सत्य मुस्कुराइ मात्र रहन्छ !

बेलाबेला शासकहरू बिर्सन्छन् कि-
सत्य
नियमित उदाउने घाम हाे
जून / तारा हाे

सत्य
झुक्याएर आउने बाढी पनि हाे
पहिराे पनि हाे !
भुइँचालाे पनि त हाे
र सत्य
एउटा भयानक महामारी हो !

असत्यकाे मायावी जालमा फसेकाे विचरा अदालतले
सत्यलाई माफी माग्न लगाइरहेकाे छ !

बेलाबेला अदालत बिर्सन्छ कि –
माटाे हाे अनि ढुझ्गा पनि
सत्य हाे !
पानी हाे
अनि हावा पनि
सत्य हाे !

सत्य
चट्याङ हाे
डढेलाे पनि त हाे !

असत्य बाँचिरहेका शासकहरू
सत्यलाई माफी माग्न लगाउँछन् !
अन्याय हाँसिरहेका न्यायाधीशहरू
सत्यकाे बयान लिन्छन् !

सत्यकाे अन्तिम रूप मृत्युु
अर्थात अन्त्य पनि त हो !

०००

काठमाडाैं