नेपाली हास्यव्यङ्ग्य अनलाइन पत्रिका

एम.पी. कियरलेस :

सर्वश्रेष्ठ प्राणी भन्दै
विज्ञानको परिभाषाभित्र
जबर्जस्ती अटाइएको हो मलाई,
को हुँ म ?

जन्मिनु अघि झारिएको हो मलाई,
को हुँ म ?

साल-नालमा लपेटिएर
चिच्याई चिच्याई सूर्यलाई बिउँझाउने,
को हुँ म ?

पुतलीको पछि पछि
बस्तुभाउ अघिअघि
जुनकिरीको तलतल
आफ्नै छायाँको माथि माथि दौडिरहेको
को हुँ म ?

यी अक्षर चिनेको
दुनियाँ बुझेको,
को अबुझ हुँ म ?

भर्खरै घरवालाले
आफ्नै घरबाट निकालेको हो मलाई,
कुन गाई हुँ म ?

उधारो तिर्न
नसकेर पुरानो बाटो बदल्ने
नयाँ को हुँ म ?

सरकारी झ्यालबाट फालिएको हो मलाई ।
स्कूलको ढोकाबाट फर्किएको हुँ म ।
अस्पतालको काउन्टरबाट फर्किएको हुँ म ।
आधी बाटोमै झरेको हुँ ।
म धेरैपल्ट मरेको हुँ ।
को अमर हुँ म ?

वाचा राख्ने,
कसम खाने
को लक्ष्मी हुँ म ?

जबर्जस्ती हात-खुट्टा बाँधेर
मण्डपमा राखिएको हो मलाई ।
लंका हिँडेको को हुँ म ?

यी विम्बै विम्बमा
बाँधिएको, म के हुँ ?
को हुँ म ?

उदाउँदो सूर्य, अस्ताउँदो जून
उदाउँदो जून, अस्ताउँदो सूर्य
यी जून-सूर्यको जीवन चक्र
हेरिरहने
को हुँ म ?

एक्काइसौं शताब्दिमा
पसिना बगाउन हिँडेको
को कमैया हुँ म ?

देशको नागरिकता भएको
तर
देशको आफ्नाको सूचीमा नभएको
को पराई हुँ म ?

यो देशको धारा-धारामा छुटेको
को हुँ म ?
सरस्वतीको मन्दिर बाहिर छुटेको
को हुँ म ?
सहर जाने बाटोमा छुटेको
को हुँ म ?
यो देशबाट छुटेको
को, मदन हुँ म ?

खाट-भुइँ
झ्याल-खाट
सिढी-आँगन
बाटो-चोक
गल्ली-ढोका
सौचालय-विद्यालय
प्रतीक्षालय-घाटालय
यी आलयहरूमा
पालो कुरिरहने को हुँ म ?

म चेसको गोटी हुँ कि ?
जहिले मर्न तयार
म लुडोको गोटी हुँ कि ?
जहिले झर्न तयार
म क्रिकेटको बल हुँ कि ?
जहिले सिमा नाघ्न तयार ।
म क्यारमको गोटी हुँ कि
जहिले हाम फाल्न तयार
कि म फुटबल हुँ ?
कोही छ मेरो पछाडि,
म को हुँ ?

परदेश पुगेको साथी भेटिन्न साथ
देश परदेश – देश परदेश
देश परदेश – परदेश देश
भन्दै भन्दै
देशभन्दा परदेश ठीक भन्ने म
को ?
देशद्रोही हुँ ?
राष्ट्रविरोधी तत्व हुँ ?
विद्रोही हुँ ?
क्रान्तिकारी हुँ ?
म परदेशी को हुँ ?

लास माथि राता चुरा फुटाउने,
को हो त्यो ?

हे ताराजी विचार नराखी तिमीले शोकै कति गर्दछ्यौ ।

यो मेरो पति हो भनेर नबुझी व्यर्थै शरीर धर्दछ्यौ ॥

जीवै हो पति भन्दछ्यौ पनि भन्या मर्दैन जीव ता कहीँ ।

देहै हो पनि भन्दछ्यौ त किन शोक गर्छ्यौ छ ऊ ता यहीँ ।

न ब्रह्मको ज्ञान
न धर्मको ज्ञान
को हो त्यो ?
को हुँ म ?

सुन्दर-शान्त देशको विमानस्थललाई दुर्गन्धित पार्ने ।
म को त्यो ?

मेरो कफनमाथि बसेर पर्यटक देश भित्रिन्छन् ।
देशले मारेको
देशभक्त हुँ म ।

समाज भन्छः
समाजका नाममा मेरो बलि आवश्यक छ ।

ईश्वर भन्छः
धर्मको नाममा मेरो बलि आवश्यक छ ।
यो मान्छेको नाममा, बलि चढ्ने
म के हुँ ?
म को हुँ ?

०००
लम्कीचुहा, कैलाली